Б.Төрөбаев: Агромеханизация чыгымды азайтып, продукциянын баасын төмөндөтөт
Суу ресурстары, айыл чарба жана кайра иштетүү өнөр жайы министри Бакыт Төрөбаев Ысык-Көл облусунун Ак-Суу районунда Машина-трактордук станциянын (МТС) расмий ачылыш аземи учурунда агросектордо механизациянын маанисине токтолду. Бул тууралуу министрликтин маалымат кызматынан билдиришти.
Министрдин айтымында, айыл чарба тармагы жаңы технологияларды жана заманбап техникаларды кеңири колдонуу менен фермерлердин чыгымдарын кескин кыскартууга жана продукциянын өздүк наркын төмөндөтүүгө жетише алат.
"Жаңы техникалар келип жатат. Эң негизгиси – аларды туура колдонуу жана профессионалдуу механизаторлорду даярдоо. Эгер механизатор жакшы болсо, техника эң жакшы иштейт. Бул – атаандаштыкка туруштук берүүнүн ачкычы", – деди Төрөбаев.
Ошондой эле ал көптөн бери колдонулбай келген щелерез сыяктуу шаймандарды фермердик иштерге кайрадан киргизүүнүн маанисин белгиледи. Бул шайман кайракы жерлерде нымды топтоого жана жер семиртүүнү жакшыртууга өбөлгө түзөт.
Министр механизациянын негизги артыкчылыктарын төмөнкүлөр менен атап өттү:
- Кол эмгеги кымбаттап жаткан учурда фермердин ишин жеңилдетет;
- Агротехникалык кызмат көрсөтүү эттин, сүттүн жана тоюттун баасын төмөндөтөт;
- МТСтердин ишке кириши рынокто баанын төмөндөшүнө алып келет.
Төрөбаев агротехникалык кызмат көрсөтүүнүн максатын мындайча белгиледи: "Бул – фермерлер үчүн чыгымды азайтып, продукциянын өздүк наркын төмөндөтүп, атаандаштыкка жөндөмдүүлүктү жогорулатуу".
