Баткен облусунун 77%ы арзан көмүр менен камсыздалды
Баткен облусунун 77%ы арзан көмүр менен камсыз болду. Бул тууралуу президенттин аймактагы өкүлчүлүгү билдирди.
Маалыматка ылайык, облустун калкын арзан баада көмүр менен камсыз кылуу максатында жергиликтүү бийлик органдары менен Сүлүктү шаарындагы көмүр шахталарынын ортосунда келишим түзүлгөн. Арзан көмүр жеткирүү иштери активдүү уланууда.
25-ноябрда Сүлүктү шаарынан Кызыл-Кыя шаарына жана Кадамжай районунун элине 424 тонна көмүр жеткирилди. Ар бир айыл аймакка калыс бөлүштүрүлүп, бир кабы 380 сомдон сатылууда. Ошондой эле Лейлек районуна да көмүр жеткирилип, айыл аймактарда баасы 270 сомдон сатылууда.
Ошентип, бүгүнкү күнгө карата Баткен облусунун эли 77% көмүр менен камсыз болду. Тагыраагы 77 миң тонна көмүр ташылып, калкка сатылды. Баткен облусунун калкынын бир жылдык керектөөсү 100 миң тоннаны түзөт.
Сүлүктү шаарындагы көмүр кендеринен ортомчусуз облус аймагына 20 миң тонна көмүр жеткирилди. Анын баасы 6,50 тыйындан 8,50 тыйынга чейин белгиленди. Бул эл тарабынан эң көп суроо талап жогору болгон көмүрдүн БР (орешка) түрү болуп эсептелет.
Ал эми "Кыргыз көмүр" ААК тарабынан облус аймагына 586 миң тонна көмүр ташылып берилди. Ошондой эле социалдык жактан муктаж болгон үй-бүлөлөргө 305 тонна көмүр акысыз жеткирилди.
