Өзгөндө 275 орундуу мектептин жаңы имараты курулуп жатат
Ош облусунун Өзгөн районуна караштуу Кеңеш айылында №43 И.Базаркулов мектебинин жаңы имараты курулууда. Бул тууралуу Курулуш министрлигинен билдиришти.
Курулуш иштер республикалык бюджеттен каржыланып, тендердик баасы 203 миллион сомду түзөт. Башкы план боюнча мектеп 275 орунга ылайыкталып, эки кабаттуу окуу корпусу спорт залы менен курулууда.
Объекттин жалпы аянты 3518 чарчы метрди түзүп, курулуш-монтаждоо иштери курулуш нормаларынын негизинде жүргүзүлүүдө. Азыркы тапта мектептин биринчи кабаты тургузулду.
Эске салсак, эски мектеп 1977-жылы курулган жана азыркы имарат ордун толук алмаштырат. Жаңы имараттын курулушу аймактагы окуучулар үчүн заманбап шарттарды түзүп, билим берүүнүн сапатын жогорулатат деп күтүлүүдө.
