"Спартак форель" кооперативи жылына 20 тонна балык өндүрүп жатат
Кыргызстанда акыркы жылдары балык чарбачылыгы, анын ичинде форель өстүрүү багыты туруктуу өнүгүп жатат. Ички рыноктогу суроо-талаптын өсүшү жана жаңы чарбалардын ачылышы тармактын динамикасын арттырууда. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.
Маалыматка караганда, форельдин баасы аймакка, логистикага жана балыктын салмагына жараша өзгөрөт. Өндүрүш көлөмүнүн жогорулашы рыноктогу баанын туруктуулугуна да оң таасир берип келет.
Тармакта ийгиликтүү иштеп жаткан чарбалардын бири — Токмок шаарындагы “Спартак форель” айыл чарба кооперативи. Бул чарба балыкты майда чабактай кезинен тарбиялап, 200–300 грамм салмакка жеткенде башка чарбаларга өстүрүүчү материал катары сатат. Ал эми 1,5 килограммдан жогору форель товардык балык болуп, ички рынокко жөнөтүлөт.
Кооператив жылына орто эсеп менен 20 тонна товардык форель өндүрөт жана продукциясын негизинен жергиликтүү рынокто сатат. Учурда Кыргызстанда жылдык форель керектөөсү 5–10 тоннаны түзөт.
Жергиликтүү өндүрүшчүлөрдүн активдешүүсү, суроо-талаптын өсүшү жана рыноктун туруктуулугу өлкөдө форель чарбачылыгынын мындан ары кеңейишине шарт түзүп жатат.
