Токтогулдагы Сары-Таш каналынын 1500 метрине бетон полотно төшөлдү
Жалал-Абад облусунун Токтогул районундагы Сары-Таш каналы узундугу 3500 метр, суу өткөрүмдүүлүгү 1,5 м³/сек болгон маанилүү сугат каналы болуп эсептелет. Бүгүнкү күндө ал 250 гектар айдоо аянтын сугат суу менен камсыздайт. Бул тууралуу Айыл чарба министрлигинен билдиришти.
Канал жерден казылып жасалгандыктан, жыл сайын камыш өсүп, суу өткөрүмдүүлүгүн төмөндөтүп, сугат суунун жеткиликтүүлүгүнө тоскоолдук кылчу. Бул маселе 2024-жылы өткөн 3-Элдик Курултайда көтөрүлүп, каналга бетон полотно төшөө пландалган.
Учурда каналдын 1500 метр аралыгына жаңы ыкма менен бетондук полотно төшөлүп, иштер толугу менен аяктады. Бул чара сугат суусун үзгүлтүксүз жеткирүүгө мүмкүндүк берип, айдоо аянттардагы суу тартыштыгын азайтууга шарт түзөт.
Жаңыланган канал аймактагы дыйкандардын өндүрүмдүүлүгүн жогорулатып, айыл чарба тармагынын туруктуу өнүгүшүнө салым кошору күтүлүүдө.
