Баткенде курулуш коопсуздугун бузган объектке 200 миң сом айып салынды
Курулуш, архитектура жана турак жай-коммуналдык чарба министрлигинин Мамлекеттик архитектуралык-курулушта контролдоо департаментинин Баткен регионалдык башкармалыгы тарабынан Баткен облусундагы курулуш объектилери көзөмөлдөнүүдө.
Курулуш министрлигинин маалыматына ылайык, көзөмөл жүргүзүүнүн алкагында, Кызыл-Кыя шаарынын Кулатов көчөсүндөгү курулуш объектисинде техникалык коопсуздук эрежелери сакталбагандыгы аныкталды.
Объект “Асыл Холдинг” ЖЧКсы тарабынан курулуп жатат. Натыйжада, аталган компанияга карата Кыргыз Республикасынын “Укук бузуулар жөнүндө” кодексинин негизинде акт түзүлүп, 200 000 (эки жүз миң) сом өлчөмүндө айып пул салынды.
Курулуш министрлиги бардык компанияларды курулуш ченемдеринин талаптарын жана техникалык коопсуздук эрежелерин так сактоого чакырат. Эгер курулуш талаптарын бузуулар аныкталса мыйзамда каралган тиешелүү чаралар көрүлөт.
