Бишкек – Хэнань: суу жана коммуналдык кызматташтыкты өнүктүрүү
Кечээ, 26-ноябрда Бишкек шаарынын мэриясында Кытайдын Хэнань провинциясынан келген делегация менен жумушчу жолугушуу өттү. Бул тууралуу муниципалитеттен билдиришти.
Кыргыз тарапты Бишкек шаарынын мэринин орун басары Нургазы Курманбеков жетектеди. Тараптар кызматташтыкты гидротехникалык курулуш, электр энергиясын өндүрүүчү объектилерди өнүктүрүү, скважиналарды бургулоо жана борбордун суу менен камсыздоосунун ишенимдүүлүгүн жогорулатуу, “Бишкексууканал” үчүн заманбап суу эсептегичтерди орнотуу жана муниципалдык адистерди окутуу багыттарында кеңейтүүнү талкуулашты.
Жолугушуунун жыйынтыгында тараптар тажрыйба алмашууга, практикалык кызматташтыкты өнүктүрүүгө жана конкреттүү техникалык чечимдерди иштеп чыгууга өз ара кызыкдар экендигин белгилешти. Бишкек шаарынын мэриясы кытай тарапка биргелешкен иштерге даярдыгы үчүн ыраазычылык билдирди.
