Digital Farmer Hackathon: Айыл чарбасында IT жана инновация
Суу ресурстары, айыл чарба жана кайра иштетүү өнөр жайы министрлиги 27-ноябрда өтүп жаткан Digital Farmer Hackathon 2025 инновациялык иш-чарасы тууралуу маалымдайт.
Бул хакатон IT-адистерди, жаш иштеп чыгуучуларды, студенттерди, фермерлерди жана агроөнөр жай өкүлдөрүн бириктирип, айыл чарба тармагына багытталган санариптик чечимдерди иштеп чыгууга мүмкүнчүлүк берет. Иш-чаранын максаты — агрардык секторду санариптештирүү жана заманбап технологияларды киргизүү боюнча жаңы идеяларды колдоо.
Катышуучулар санариптик сервистердин прототиптерин, программалык чечимдерди, маалыматтарды талдоо инструменттерин, ресурстарды башкаруу системаларын жана агрардык өндүрүштү эффективдештирген технологияларды иштеп чыгышууда. Хакатонго студенттер, жаш адистер, программисттер, IT-командалар, дизайнерлер, ишкерлер жана айыл чарбасын санариптештирүү боюнча идеялары бар жарандар катышууда.
Иш-чара APIU, ФАО, Green Light ITS, IBM, Salavat Events жана Аймактарды өнүктүрүү боюнча социалдык өнөктөштүк фондунун колдоосу менен өтүүдө. Digital Farmer Hackathon 2025 агрардык тармакка инновацияларды киргизүүгө, жаш кадрларды колдоого жана агротехнологияларды өнүктүрүүгө багытталган маанилүү кадам болуп саналат.
Министрлик бардык катышуучуларды тармактын келечегин бирге түзүүгө чакырат.
