Эсептөө палатасы эл аралык аудит стандарттарына өтүүдө
25-ноябрда КРнын Эсептөө палатасы 2023-2025-жылдарда ишке ашырылган Глобалдык отчеттуулук демилгесинин (GSAI) өнөктөштөрүн колдоо долбоорунун биринчи фазасынын жыйынтыктарын чыгарды. Бул тууралуу Эсептөө палатасынан билдиришти.
Европа Биримдиги жана Сауд Аравиянын Жогорку аудитордук органынын колдоосу менен Польшанын Жогорку контролдук палатасы (ВОАП) жана IDI менен биргеликте ишке ашырылган долбоор улуттук аудит тутумун модернизациялоого, мамлекеттик башкаруунун ачыктыгын жана эффективдүүлүгүн жогорулатууга багытталган.
Иш-чарада долбоордун жыйынтыктары, методологиялык жаңыртуулар, кадрдык потенциалды жогорулатуу жана санариптик трансформациянын жетишкендиктери сунушталды. Ошондой эле мамлекеттик органдардын, эл аралык эксперттердин жана ЖМКлардын катышуусунда «Жогорку аудитордук органдын көзкарандысыздыгы жана мамлекеттик ресурстарды башкаруудагы ролу» темасында дискуссия өттү.
Эсептөө палатасынын төрагасы жасалган иштердин маанисин белгилеп, бардык өнөктөштөргө ыраазычылык билдирди. Ал GSAI долбоорунун кийинки фазасында да аудиттин отчеттуулугун, көзкарандысыздыгын жана ачыктык деңгээлин жогорулатууга милдеттенгенин баса айтты.
