Кыргызстандагы жалгыз геологиялык лаборатория заманбап жабдуулар менен жаңыланды
Кыргызстандын Жаратылыш ресурстары, экология жана техникалык көзөмөл министрлигине караштуу "Борбордук лаборатория" катуу пайдалуу кендерди изилдөөгө жана лабораториялык-аналитикалык камсыздоого жооп берген жалгыз мамлекеттик лаборатория болуп эсептелет.
Лаборатория 1940-жылдан бери өлкөдөгү негизги кендер боюнча аналитикалык изилдөөлөрдү жүргүзүп келет жана ISO/IEC 17025, ISO/IEC 17020 жана ISO/IEC 17043 эл аралык стандарттарына ылайык иштейт. Жыйынтыктары ILAC эл аралык аккредитациялоо уюму тарабынан таанылган.
2025-жылдын март айында лаборатория өзүнүн техникалык базасын модернизациялап, S6 JAGUAR толкун-дисперсиялык рентгенофлуоресценттик спектрометрин жана ELEMENTRAC CS-d анализаторун киргизди. Жаңы жабдуулар изилдөөлөрдүн ылдамдыгын жана тактыгын кыйла жогорулатууга мүмкүндүк берет.
Лаборатория кендерди изилдөө, концентраттарга көзөмөл жүргүзүү, геологиялык чалгындоонун сапатын баалоо жана лабораториялар аралык салыштырма сыноолорду жүргүзүү иштерин аткарат. Ошондой эле жаңы методикаларды иштеп чыгуу, стандарттык үлгүлөрдү түзүү жана квалификацияны текшерүү программаларын уюштуруу боюнча да иштерди улантууда.
