Тоң районунда УКМКнын жаңы имараты пайдаланууга берилди
Бүгүн УКМКнын Ысык-Көл облусу боюнча башкармалыгынын Тоң райондук бөлүмүнүн жаңы имараты ачылды. Бул тууралуу УКМКнын маалымат кызматынан билдиришти.
Иш-чарага УКМК төрагасы Камчыбек Ташиев, президенттин Ысык-Көл облусундагы өкүлү Бакытбек Жетигенов, Жергиликтүү өз алдынча башкаруу органдарынын жетекчилиги, ардагерлер жана кызматкерлер катышты.
Жаңы имарат толугу менен заманбап техникалар менен жабдылып, аскер кызматкерлеринин жемиштүү иштөөсү үчүн бардык шарттар түзүлгөн. Керектүү байланыштык каражаттар жана тармактык жабдуулар менен камсыздалды.
"Атайын кызматтардын материалдык-техникалык базасын жакшыртуу боюнча иш-чаралар тынымсыз жүрүп жатат. Мындан улам кызматкерлердин ишмердүүлүгү таза жана адилеттүү болуусу керек деген талап коюлду", - деген ал жемкорлук жана башка мыйзамсыз иштер менен күрөшүү, өзгөчө коопсуздук кызматкерлери арасында катуу көзөмөлгө алынарын кошумчалады.
Иш-чаранын соңунда Ташиев Тоң районунун жергиликтүү тургундары менен жолугуп, алардын көйгөйлөрүн угуп, тийиштүү жетекчилерге тапшырмаларды берди.
