Бишкекте адамдык капиталды өнүктүрүүнүн келечеги талкууланды
25-ноябрда Бишкекте “Социалдык өнүгүү боюнча Экинчи дүйнөлүк саммитинин жыйынтыктары боюнча андан аркы кадамдар” аттуу консультациялар өттү. Иш-чарага өнүктүрүү боюнча өнөктөштөр, эл аралык уюмдар, мамлекеттик органдар жана эксперттер коомчулугу катышты. Бул тууралуу Эмгек, социалдык камсыздоо жана миграция министрлигинен билдирди.
Эмгек, социалдык камсыздоо жана миграция министринин орун басары Бакыт Дарманкул уулу өз сөзүндө Кыргызстанда адамдык капиталды өнүктүрүү билим берүү, саламаттык сактоо, иш менен камсыз кылуу жана социалдык коргоо тармактарындагы улуттук артыкчылыктар менен тыгыз байланышта экенин белгиледи. Анын айтымында, бул багыттар 2030-жылга чейин Кыргыз Республикасын өнүктүрүүнүн Улуттук программасындагы максаттарга жетүүдө чечүүчү роль ойнойт.
Ал Дохада кабыл алынган Саясий декларация Кыргызстандын артыкчылыктарына толук шайкеш келерин айтып, жакырчылыкты жоюу, татыктуу эмгекке жеткиликтүүлүктү кеңейтүү, сапаттуу социалдык кызматтарды камсыз кылуу, жаштардын дараметин өнүктүрүү жана “эч кимди артта калтырбоо” принциптерин баса белгиледи.
Министрдин орун басары Кыргызстандын демографиялык мүмкүнчүлүгүнө токтолуп, калктын жарымынан көбү эмгекке жарамдуу жашта, ар бир үчүнчү жаран бала экенин белгилеп, бул потенциалды туруктуу экономикалык өсүшкө айлантуу маанилүү экенин айтты.
Ал өнүктүрүү боюнча өнөктөштөр менен кызматташууну мындан ары да күчөтүүгө даяр экенин билдирип, Улуттук программаны практикалык кадамдар аркылуу ишке ашыруу маанилүү экенин кошумчалады.
“Адамга инвестиция салуу — туруктуу өнүгүүнүн негизи. Биз татыктуу эмгекке жеткиликтүүлүктү, кесиптик билим берүүнүн жана социалдык коргоонун сапатын жогорулатууну улантабыз, ошондо ар бир жаран өз дараметин толук ишке ашыра алат”, — деди Бакыт Дарманкул уулу.
