Кыргызстан Германияга ишке орноштуруу, миграция жана калктын аярлуу катмарын колдоо боюнча кызматташуу сунуштарын билдирди
Кечээ эмгек, социалдык камсыздоо жана миграция министри Канат Сагынбаев Германиянын Социалдык иштер жана Экономика министрликтеринин мамлекеттик катчылары менен жолугушканы маалым болду.
Жолугушууда министр эки тараптуу кызматташуунун үч негизги багытын белгиледи. Анын бири - кыргызстандык жарандарды Германияда ишке орноштуруу. К.Сагынбаевдин билдиришинче, 2023-жылдан 2025-жылдын 1-октябрына чейинки мезгилде өлкөдөн 6 710 студент Германияда иштөөгө жөнөтүлгөн. Муну көбөйтүүгө мүмкүнчүлүк бар.
Ошондой эле министр адистерди алдын ала даярдоо борборун түзүү пландары тууралуу билдирди. Ага немис тилине окутуу, кесип тандоо, тышкы эмгек миграциясы боюнча жарандарды чет өлкөдө ишке орноштуруу мамлекеттик борборунун ролу кирет.
Буга улай Канат Сагынбаев экинчи багыт — миграция жана реадмиссия тармагындагы кызматташтык экенин билдирди.
“Биз реадмиссия боюнча өзүнчө келишим түзүүнү сунуштайбыз. Бул тараптардын компетенцияларын так бөлүүгө, макулдашуу процессин тездетүүгө жана өз ара аракеттенүүнүн натыйжалуулугун жогорулатууга шарт түзөт”, - деди министр.
Ошондой эле ал үчүнчү багыт — калктын аярлуу катмарларын колдоо боюнча тажрыйба алмашуу маселесине да токтолду. Мында министр Ottobock компаниясы менен кызматташуу тууралуу эске салды. “Биз социалдык саясат, жумушка орноштуруу жана миграция маселелери боюнча жумушчу топ түзүүгө жана биргелешип иштөөгө ачыкпыз”, — деди министр.
