Кыргызстан Кытайга 32 түр айыл чарба продукциясын экспорттой алат
Суу ресурстары, айыл чарба жана кайра иштетүү өнөр жайы министрлиги Кытайга продукция экспорттоого кызыккан ата мекендик өндүрүүчүлөргө жана экспорттоочуларга маалымат берип, колдоо көрсөтүүгө даяр экенин билдирди.
Министрликтин маалыматына караганда, Кыргызстан менен Кытайдын соода-экономикалык кызматташуусу кеңейип жаткан шартта өлкө КЭР рыногуна экспортту жандандыруу боюнча системалуу иштерди жүргүзүүдө. Бул иштерге уруксат документтерин даярдоо, зарыл макулдашууларды алуу, кытайдын тиешелүү органдары менен түз байланышуу жана рынок талаптары боюнча кеңеш берүү кирет.
Учурда Кыргызстан Кытайга 32ден ашык түрдөгү айыл чарба продукцияларын экспорттоого укуктуу. Алардын катарына бал, сүт азыктары (быштак жана кургак сүт), буурчак, алча, коон, жаңгак, жүн, балык жана форель, ошондой эле эл аралык протоколдордо көрсөтүлгөн башка товарлар кирет.
Кытайга экспорттоону пландаштырган ишкерлер Министрликтин Эл аралык кызматташтык, экспорт жана инвестициялар башкармалыгына кайрылып төмөнкү багыттар боюнча жардам ала алышат:
- КЭРдин учурдагы талаптары жана регламенттери боюнча маалымат берүү;
- Экспорт учурунда макулдашуу жана маалымдоо процедураларын коштоп жүрүү;
- Кытайдын компетенттүү органдары менен байланышуу;
- Документтерди даярдоого жана экспорттук партияларды түзүүгө консультация берүү.
Министрлик айыл чарба товарларынын Кытайга экспорттолчу тизмесин көбөйтүүгө жана өндүрүүчүлөр үчүн ыңгайлуу шарттарды түзүүгө багытталган иштерди мындан ары да улантарын белгиледи.
