Кыргызстандын суу ресурстары талкууланды: 45 миңден ашык дарыя, 10 миңдей мөңгү бар
Бүгүн Бишкекте "Кыргызстандын ирригация секторуна инвестициялар" аттуу тегерек стол өттү. Ага эл аралык уюмдардын, донорлордун, инвесторлордун жана эксперттердин өкүлдөрү катышып, өлкөнүн суу ресурстарынын учурдагы абалы, ирригациянын келечеги жана инвестиция тартуу стратегиялары талкууланды. Бул тууралуу Айыл чарба министрлигинин басма сөз кызматынан билдиришти.
Кыргызстанда ири көлөмдөгү суу ресурстары бар болсо да, кепилденген пайдаланууга жеткиликтүү көлөм чектелүү. Мамлекеттик маалыматтарга ылайык, жыл сайын болжол менен 50 млрд м³ дарыя, 14 млрд м³ жер астындагы суу, 10 миңдей мөңгү жана 45 миңден ашык дарыя агымы бар. Эл аралык көрсөткүчтөр боюнча, суу стресси деңгээли 3,28ге жетип, "кризистин алдындагы" абалга жакындаган.
Суу ресурстары, айыл чарба жана кайра иштетүү өнөр жайы министрлигинин өкүлү Алмаз Жээналиев реформалардын негизги багыттарын тааныштырып, 2040-жылга чейинки Улуттук суу стратегиясы, Суу кодексинин жаңы редакциясы жана суу секторун модернизациялоочу башка программалар тууралуу маалымат берди.
Талкууларда инвестициялар суу сактагычтарды куруу жана модернизациялоо, ирригациялык каналдарды реконструкциялоо, суу үнөмдөөчү технологияларды киргизүү, санариптештирүү жана климаттык адаптациялоо инфраструктурасын өнүктүрүү багыттарына бурулары белгиленди. Катышуучулар мамлекет менен эл аралык өнөктөштөр сектордун өнүгүү приоритеттери боюнча бирдиктүү позицияда экенин айтышып, биргелешкен аракеттер өлкөнүн суу жана азык-түлүк коопсуздугун бекемдөөгө жардам берерин белгилешти.
