Өзгөндө жер тилкелерин мыйзамсыз трансформациялаган адамдар кармалды
КР УКМК мамлекеттик жана муниципалдык жерлерди жеке менчикке мыйзамсыз өткөрүп берүү фактысы боюнча козголгон кылмыш ишинин алкагында Өзгөн районунун Дөң-Булак айыл округунун мурдагы башчысы 1967-жылы туулган С.Э.Р., жер инспектору 1984-жылы туулган М.Ф.А. жана 1983-жылы туулган М.Э.Э. аттуу жаран кармалып, КР УКМКнын тергөө абагына киргизилди.
Аталган адамдар 2016-жылдан 2022-жылга чейин башка мамлекеттик органдардын кызматкерлери менен алдын ала сүйлөшүп, жасалма документтерди даярдап, Өзгөн районундагы 1,5 гектар жер тилкелерин трансформациялап, кийинчерээк сатып жибергени аныкталган.
Учурда Кыргыз Республикасынын Улуттук коопсуздук мамлекеттик комитети жогоруда айтылган махинацияга тиешеси бар калган адамдарды аныктоо жана жоопкерчиликке тартуу боюнча тергөө иш-чараларын улантууда.
Белгилей кетсек, жерди трансформациялоо укугу Кыргыз Республикасынын Министрлер Кабинетинин токтомунун алкагында гана ишке ашырылат.
