Ак-Талаа районунда топоз эти элге 550 сомдон сатылды
Нарын облусунун Ак-Талаа районунда топоз эти 550 сомдон сатылганын Суу ресурстары, айыл чарба жана кайра иштетүү өнөр жайы министрлиги “Кабар” агенттигине билдирген.
Арзандатылган баадагы эт Ак-Талаа райондук мамлекеттик администрациясы жана Ак-Талаа райондук агрардык өнүктүрүү башкармалыгынын демилгеси менен калкты социалдык колдоо жана кышкы сезонго даярдык көрүү максатында сатылды.
Иш-чаранын алкагында “Толо-Темир” асыл тукум чарбасы райондун тургундары үчүн топоз жана тайдын этинин 1 килограммын 550 сомдон сунуштады. Бул акция 1-декабрда өткөрүлүп, калкка этти базар баасынан кыйла төмөн баада сатып алууга мүмкүнчүлүк түздү.
Акимчиликтин өкүлдөрүнүн айтымында, бул акция жакынкы күндөрү дагы улантылат.
