БШК: Парламенттик шайлоого 1 млрд 582 млн сом сарпталды
БШК мөөнөтсүз парламенттик шайлоого катышкан талапкерлердин үгүт фонддорунун каржылоосу боюнча маалыматтарды жарыялады. БШКнын контролдук-ревизиялык тобунун маалыматына караганда, көп мандаттуу округдар боюнча талапкерлер жана 9 талапкер көрсөткөн «Ынтымак» партиясы жалпы 510 атайын эсепти “Элдик Банк” жана “Айыл Банкта” ачкан.
Комиссия маалымдашынча, шайлоо убагында “Финансылык ачыктык” автоматташтырылган системасы колдонулуп, ал “Түндүк” аркылуу маалымат алып, акча түшүүлөр менен чыгымдарды БШКнын сайтында реалдуу убакытта көрсөтүп турган.
29-ноябрга карата үгүт фонддорунун атайын эсептерине жалпы 1 млрд 791 млн сом түшкөн:
- талапкерлердин жеке каражаттары — 1 млрд 92 млн сом;
- партиянын жеке каражаттары — 3,797 млн;
- жарандардын ыктыярдуу кайрымдуулугу — 659,063 млн;
- юридикалык жактардын кайрымдуулугу — 13,208 млн.
- Туура эмес түшкөн каражаттардын кайтарылышы 22,079 млн сомду түзгөн.
- 1 миллиард 582 млнн сом чыгымдалды
Шайлоо кампаниясы учурунда талапкерлер жана партия төмөнкү багыттарга каражат бөлүшкөн:
- шайлоо күрөөсү — 147,08 млн сом;
- мамлекеттик жана муниципалдык мекемелердин кызматтары — 11,875 млн;
- ар кандай кызматтар (байланыш, ижара, күйүүчү май, агитаторлордун, байкоочулардын жана штабдын акысы) — 1 млрд 134 млн;
- агитациялык материалдарды даярдоо жана таратуу — 230,7 млн, анын ичинен 8,9 миллиону мүмкүнчүлүгү чектелген адамдар үчүн ылайыкташтырылган материалдарга;
- башка чыгымдар — 42,38 млн.
Чыгымдар боюнча туура эмес төлөмдөрдү кайтаруу 15,931 миллион сомду түзгөн. Эсептерде калган каражат — 209,2 миллион сом.
БШК белгилегендей, бардык талапкерлердин үгүт фонддорунун түшүүлөрү жана чыгымдары мыйзамдагы чектен — бир талапкерге 20 миллион сомдон ашкан эмес.
БШКнын депозиттик эсебине жалпы 147,08 миллион сом шайлоо күрөөсү түшкөн, анын ичинде:
- 478 өзүн-өзү көрсөткөн талапкерден — 143,4 миллион сом;
- I жана II топтогу мүмкүнчүлүгү чектелген 14 талапкерден — 0,7 миллион;
- III топтогу 4 талапкерден — 0,28 миллион;
- “Ынтымак” партиясынын 9 талапкеринен — 2,7 миллион.
Бул каражаттар республикалык бюджетке өткөрүлөт.
