Элдар Абакиров №26 округдагы 460 миң сомду териштирүүнү талап кылды
№26 шайлоо округунан Жогорку Кеңештин депутаттыгына талапкер Элдар Абакиров БШКдан жана укук коргоо органдарынан ушул шайлоо округундагы 460 миң сомдун чоо-жайы боюнча териштирүүнү талап кылганын "Азаттык" жазды.
“20 күндө эки чоң мыйзам бузуу аныкталган. Бири Бишкек шаарында талапкер 80 миң доллар таратып жаткан жеринен кармалып, шайлоодон четтетилди. Экинчи чоң мыйзам бузуу Кемин районундагы Калмак-Ашуу айылында 5-6 киши 460 миң сом менен кармалды. Кызыгы, бул аягына чыкпай, каражаттын ээси жоктой эле болуп калды. Күч органдары, бийлик, БШК элдин таза шайлоого ишенимин актайм десе, күнөөлүүнү таап, шайлоодон четтетет. Бул адилеттүү жана таза чечим болот”, - деген Абакиров.
Ал бул иш боюнча күнөөлүүлөр аныкталбаса, №26 шайлоо округундагы шайлоонун жыйынтыгын жокко чыгарууну сунуштады. БШК мүчөсү Узарбек Жылкыбаев бул билдирүү боюнча Ички иштер министрлиги тергөө жүргүзүп жатканын билдирген.
Эске салсак, БШК 30-ноябрда Жогорку Кеңештин депутаттарын шайлоодо добуш сатып алуу боюнча тогуз кылмыш иши козголгонун, бул боюнча 12 кишиге айыбы угузулганын билдирген.
