2025-жылдын эң маанилүү курулуш ишинин бири - “Манас” эл аралык аэропорту
“Манас” эл аралык аэропортун реконструкциялоо 2025-жылдын эң маанилүү курулуш иштеринин бири болуп саналат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка караганда, реконструкциялоо иштери Курулуш министрлигине караштуу “Кыргызкурулуш” мамлекеттик ишканасы тарабынан көзөмөлдөнүп, “Авангард” компаниясы тарабынан жүргүзүлүүдө. Ал эми аэропорттун эскиздик долбоору Шаар куруу жана архитектура департаменти тарабынан иштелип чыккан.
Аэропорттун инфратүзүмү болжол менен 39 миң чарчы метр аянтты ээлеп келген болсо, долбоорго ылайык, 18 миң чарчы метрге кеңейтилет. Мындан сырткары, заманбап skywalk-жабык өтмөгү курулат.
Ошондой эле, аэропорттун дизайны улуттук колориттин негизинде толук өзгөртүлүп Манас атанын эстелиги коюлат. Ошол эле учурда эл аралык стандарттарга толук жооп берет. Мындан сырткары, траволатор, эскалаторлор орнотулуп, долбоорго ылайык экинчи кабатта бийиктиги 8,8 метр, туурасы 15,5 метр, узундугу 255,5 метр болгон күтүү залы каралган.
Бүгүнкү күндө А, Б, В, Г, Д блокторунда ички инженердик системаларды монтаждоо, чатырдын металл конструкцияларын орнотуу жана ички дубалдарындагы кошумча иштер аткарылууда.
0:00
/0:36
