Суу тазалагыч фильтрди койгондо, суунун пайдасы жоголот
Бишкектиктерге суу тоодон түшкөн арыктан берилбейт. Шардыктар үчүн артезин суусу 200м тереңдиктен алынат жана тазаланып, хлорлонуп, бактерияланып, анан элге берилет. Мындай маалыматты Бишкек суу каналынын Суунун жабдуу кызматынын башчысы Кеңешбек Акматов Биринчи радионун “Маанилүү маек” программасынын жүрүшүндө билдирди.
Анын айтымында, суу хлорлонуп, чыпкалануудан сырткары бактерияциддик лампа түтүктөрү аркылуу өткөрүлөт. Суунун сапатын атайын лабороториянын өкүлдөрү күн сайын анализдеп, текшерип турат. Тийиштүү учурда суу түтүктөрү атайын тазалануудан өтөт.
“Бишкек шаарындагы суу түтүктөрүнөн келген суунун сапаты абдан жакшы. Анын курамында тийиштүү заттын баары бар. Ал эми үйлөргө фильтр коюштун менимче кажети жок. Албетте фильтр коюш ар бир жарандын өз эрки. Бирок аны койгондо суудагы болгон керектүү жана керексиз заттын баары өлүп калат да, суунун эч кандай пайдасы жок, өлүк суу болуп калат.” – деп билдирди, Кеңешбек Акматов.
Адистин айтымында, илгери сыртка чыгып агып турган суу азыр 100 метрге чейин терең качып кетти. Андыктан ашыкча чыгым кылбоо максатында, эсептөөчү каражаттарды койдуруу аракети кызуу жүрүп жатат. Сууну ашыкча чыгымдоо көйгөйү айрычка жеке менчик үйлөрү жайгашкан конуштарда көп кездешет.
