БШК: 87 талапкер Жогорку Кеңештин депутаттыгына шайланды
КРнын Борбордук шайлоо комиссиясы 2025-жылдын 30-ноябрына дайындалган КРнын Жогорку Кеңешинин депутаттарын мөөнөтүнөн мурда шайлоонун жыйынтыктары тууралуу токтомду кабыл алды.
Бул тууралуу БШКдан маалымдашты.
Билдирүүгө караганда, БШК 30 көп мандаттуу округда шайлоо өткөнүн таанып, шайлоонун жыйынтыктарына ылайык 29 көп мандаттуу округдан 87 талапкер Жогорку Кеңештин депутаттыгына шайланды.
Ал эми №13 округда өткөн шайлоонун жыйынтыгын мыйзам талаптарын сактабагандыгы үчүн жокко чыгарды.
2025-жылдын 30-ноябрында өткөн Жогорку Кеңештин депутаттарын мөөнөтүнөн мурда шайлоодо шайлоочулардын тизмесине 4 294 243 жаран киргизилип, 1 584 446 шайлоочу добуш берди. Бул жалпы шайлоочулардын 36,90 % түздү. Аралыктан добуш берүү шайлоо участоктору аркылуу 190 030 жаран шайлоого катышты.
Жалпысынан КРнын Жогорку Кеңешинин депутаттарын мөөнөтүнөн мурда шайлоо мыйзам талаптарына ылайык, кынтыксыз жогорку деңгээлде өттү, деп билдирген БШКнын маалыматында.
