Жаңы жылдан тарта ЖК депутаттары манжа изи же жүздү тааныган тутум менен добуш беришет
Жогорку Кеңештин депутаттары манжанын изи же адамдын жүзүн тааныган функциясы бар электрондук тутум менен добуш берүү системасын 2026-жылдан баштап ишке киргизүү пландалып, ушул тапта техникалык жактан даярдык иштери жүрүп жатканы "Азаттык" жазды.
Регламент боюнча добуш берүүнүн ачык, бюллетендерди пайдалануу менен жашыруун добуш берүү сыяктуу түрлөрү бар. Депутат кайсы бир маселе боюнча өзү гана добуш бериши керек жана добуш берүү укугун башка депутатка өткөрүүгө тыюу салынат.
Бирок ага карабастан буга чейин эл өкүлдөрү бири-бири үчүн добуш берип койгон учурлар болгон.
Кыргызстанда 30-ноябрда Жогорку Кеңешке шайлоо өттү. Борбордук шайлоо комиссиясы (БШК) 29 округдан 87 талапкерди парламенттин депутаттыгына шайланды деп тапты. Ал эми №13 округда өткөн шайлоонун жыйынтыгы мыйзам бузууларга байланыштуу жокко чыгарылган. Бул округда эми кайра шайлоо өтүшү керек.
Жогорку Кеңештин VIII чакырылышынын биринчи жыйыны 17-декабрда өтүп, жаңы шайланган депутаттар ант беришет.
