Жаңы жылдык каникулдарды 12-январга чейин узартуу сунушталды
Кыргызстанда жаңы жылдык каникулдарды 12-январга чейин узартуу пландалып жатат. Тиешелүү МинКаб токтомунун долбоору коомдук талкууга чыгарылды.
МинКаб маалыматына ылайык, эс алуу жана майрам күндөрүн рационалдуу пайдалануу үчүн, бюджеттен каржыланган мамлекеттик жана муниципалдык уюмдардын, мекемелердин жана ишканалардын беш күндүк иш графигинде иштеген кызматкерлери үчүн төмөнкүдөй сунуш сунушталып жатат:
- 2026-жылдын 8 жана 9-январын эс алуучу күндөр катары белгилөө,
- 2026-жылдын 7-февралындагы эс алуу күнүн — 2026-жылдын 8-январына,
- 2026-жылдын 25-апрелиндеги эс алуу күнүн — 2026-жылдын 9-январына которуу.
Түшүндүрмө-негиздемеде айтылгандай, азыркы мезгилде жана Жаңы жылдан кийинки убакта курч респиратордук вирустук инфекциялар жана сасык тумоо оорулары салттуу түрдө көбөйөт.
2026-жылы мектеп окуучуларынын кышкы каникулу 12-январга чейин белгиленгендиктен, ата-энелердин балдары менен бирге эс алуулары үй-бүлөлүк баалуулуктарды чыңдоого жардам берет.
"Январдын алгачкы эки жумасы — кышкы туристтик сезондун эң кызуу убагы. Каникулдарды узартуу чакан жана орто бизнес үчүн кошумча киреше алып келип, туристтик мүмкүнчүлүгү бар региондордун өнүгүшүнө өбөлгө түзөт. Ошондой эле энергетикалык дефицитти кыскартууга, коммуналдык инфраструктурага түшкөн жүктү азайтууга жардам берет. Жаңы жылдык каникулдарды 12-январга чейин узартуу мамлекеттик мекемелердин ишинин натыйжалуулугун жогорулатат, социалдык-экономикалык көрсөткүчтөрдү жакшыртат жана калктын ден соолугун жана жыргалчылыгын чыңдоого салым кошот", — деп билдиришти Эмгек министрлигинен.
Ведомствонун маалыматына караганда, каникулдарды узартуу боюнча чечимди кабыл алуу олуттуу бюджеттик чыгашаларды талап кылбайт.
