Алайкуудагы кар жиреп мектепке бараткан Нурзаман Президенттик балатыга чакырылды
Жакында эле соцтармактардын бирине калың карды жиреп мектепке бара жаткан окуучунун видеосу чыгып, коомчулукта чоң талкуу жараткан. Ошол Кара-Кулжа районунун Коо-Чаты айылындагы "Айдың-Көл" башталгыч мектебинин 4-классынын окуучусу Нурзаман Алмазбеков президенттик балатыга чакырылганын президенттин администрациясынын маалыматтык саясат кызматынын жетекчиси Дайырбек Орунбеков социалдык тармактагы баракчасына жазды.
"Бул видеону Садыр Жапаров өзү да көрүп, оор шартка карабай билим алууга болгон умтулуусун көрсөткөн кичинекей баланын аракетине абдан ыраазы болду. Президентибиз мындай өжөр жана шыктуу балдар өзгөчө колдоого татыктуу экенин белгилеп, аны президенттик балатыга чакыргыла деп тапшырма берди. Мындан тышкары, билимге умтулган окуучуга мамлекет башчысынын атынан белек даярдалып жатат",-деп жазган Д.Орунбеков баракчасында.
Буга улай ал Нурзаман Алмазбеков алты бир туугандын төртүнчүсү. Атасы Алмаз 39 жашта, апасы Жумагүл 38 жашта, экөө тең үй чарбасы менен алек. Нурзаман мектептеги алдыңкы окуучулардын бири, математика жана кыргыз адабияты сабагына көп көңүл бурат. Ошондой эле сүрөт тартууга, спорттун футбол түрүнө шыктуу экенин кошумчалаган.
