БШК депутаттарга төш белгилерди качан тапшырарын билдирди
Жогорку Кеңештин каттоодон өткөн депутаттарына белгиленген үлгүдөгү ырастамалар жана төш белгилер 17-декабрда расмий түрдө тапшырылат. Бул тууралуу Борбордук шайлоо комиссиясы маалымдады.
БШКнын билдирүүсүнө ылайык, 12-декабрда 29 көп мандаттуу округ боюнча шайланып келген 87 депутатты каттоо жөнүндө тиешелүү токтом кабыл алынган. Ошол эле учурда №13 шайлоо округунда өткөн добуш берүү мыйзам талаптары бузулгандыгына байланыштуу жараксыз деп табылган.
Эске салсак, Жогорку Кеңештин депутаттарын мөөнөтүнөн мурда шайлоого жалпысынан 589 жаран талапкер катары көрсөтүлгөн. Алардын ичинен 63 талапкер өз арызын кайтарып алган, 56 жаранга каттоодон өтүүдөн баш тартылган, ал эми 10 талапкердин каттоосу жокко чыгарылган.
Шайлоого жыйынтыгында 460 талапкер катышкан. Алардын 271и эркек, 189у аял талапкерлер болуп, ошондой эле майыптыгы бар 16 талапкер катышкан.
Борбордук шайлоо комиссиясы VIII чакырылыштагы Жогорку Кеңештин курамында "Президентти жана Жогорку Кеңештин депутаттарын шайлоо жөнүндө" конституциялык мыйзамда каралган гендердик квотанын талаптары толук сакталганын белгиледи.
