Чоң-Алайдын "Наркул" чарбасында 320 баш асыл тукум топоз багылууда
Суу ресурстары, айыл чарба жана кайра иштетүү өнөр жайы министрлигинин демилгеси менен ишке ашырылып жаткан "30+20+10" долбоору аймактарда мал чарбачылыгын өнүктүрүүдөгү натыйжалуу механизм катары өз жемишин берүүдө.
Айыл чарба министрлигинин маалыматына ылайык, долбоордун алкагында Ош облусунун Чоң-Алай районуна караштуу Чоң-Алай айыл өкмөтүнүн Жар-Башы айылында жайгашкан "Наркул" асыл тукум топоз чарбасы этап-этабы менен кеңейип, туруктуу иш алып барууда.
Учурда чарбада жалпы 320 баш асыл тукум топоз багылып, өндүрүштүк база толук кандуу камсыздалган. Тактап айтканда, мал кармоочу сарайлар, бастырмалар жана дан сактоочу жайлар талапка ылайык жабдылган.
Мындан тышкары, чарба "30+20+10" долбоорунун алкагында мал чарбачылыгын кеңейтүү жана өндүрүш көлөмүн жогорулатуу багытында активдүү иштерди жүргүзүүдө. Бул багыттагы иш-чаралар райондук агрардык өнүктүрүү башкармалыгы жана ветеринардык кызмат менен тыгыз кызматташтыкта ишке ашырылууда.
Чарбанын жетекчиси Патаевдин айтымында, адистердин үзгүлтүксүз консультациялары жана колдоосу чарбанын туруктуу өнүгүшүнө өбөлгө түзүүдө.
"Буюрса, башталган жаңы долбоорлор жакшы жыйынтыктарды берет деп ишенебиз", — деди фермер.
