Дыйкандарга 21 млрд сомго 9 миңден ашуун техника лизингге берилди
Банктар аркылуу айылдык товар өндүрүүчүлөргө айыл чарба техникалары жана кайра иштетүү өнөр жайы үчүн жабдуулар жеңилдетилген шарттарда – жылдык 6% үстөк пайызы менен 7 жылдык мөөнөткө лизингге берилүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Маалыматка ылайык, мамлекеттик колдоонун алкагында бүгүнкү күнгө чейин 21,8 млрд сомго 9 016 даана техника дыйкандарга лизинг жолу менен берилген. Анын ичинен 2025-жылы 7,2 млрд сомго 2 029 техникатапшырылган.
Алардын катарында:
- тракторлор – 854 даана,
- комбайндар – 56,
- айыл чарба машиналары – 407,
- кайра иштетүү техникалары – 13,
- атайын техникалар – 709 даана бар.
Белгиленгендей, айыл чарбасын механизациялоо максатында министрлик тарабынан дыйкандардын техника паркын жаңылоо жана толуктоо багытында иштер улантылууда. 2011-жылдан бери "Айыл Банк" жана "Элдик Банк" аркылуу 7 лизинг долбоору ишке ашырылып, айыл чарба техникасын жеткиликтүү шарттарда алуу мүмкүнчүлүгү түзүлүүдө.
