Кара-Сууда фермерлер үчүн жаңы тейлөө борбору ачылды
Кара-Суу районунун Большевик айылында Түштүк аймактагы дыйкан-фермерлер үчүн Министрликтин аймактык өкүлчүлүгү жана “Фермерлерди тейлөө борбору” расмий түрдө ачылды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Эми дыйкан-фермерлер мамлекеттик кызматтарды жеринде алып, агрардык маселелерди “Бир терезе” принциби менен ыкчам чечүүгө мүмкүнчүлүк алышат. Бул аркылуу фермерлер убактысын үнөмдөп, чыгымын азайтып, натыйжаны тезирээк көрө алышат.
Жаңы имаратта министрликтин бардык ведомстволук түзүмдөрүнүн кызматкерлери иш алып барат. Бул борбор фермер үчүн кеңсе, консультациялык борбор жана билим булагы катары кызмат кылат.
Суу ресурстары, айыл чарба жана кайра иштетүү өнөр жайы министри Бакыт Төрөбаев борбордун ачылыш аземинде белгилегендей:
“Министрликтин түштүк өкүлчүлүгү жана “Фермерлерди тейлөө борбору” аркылуу дыйкан-фермерлер агротехнология, суу пайдалануу, кайра иштетүү, субсидиялар, программалар жана башка көйгөйлүү маселелер боюнча бир жерден кеңеш алып, чечим таба алышат. ‘Бир кабинеттен экинчисине чуркоо’ доору аяктап, мамлекет фермерге жакындаган учур келди!”
Бул борбордун ачылышы Түштүк аймактагы айыл чарба өнүгүүсүнө жаңы дем берип, фермерлердин ишин жеңилдетүүгө багытталууда.
