Кыргызстанда 221 миңден ашык майыптыгы бар адамдын 29 миңи жумушка даяр

15-декабрда Бишкекте "Майыптыгы бар адамдардын эмгек укуктарын ишке ашыруу" аттуу тегерек стол өттү. Иш-чара жумуш менен камсыздоону кеңейтүү жана инклюзивдүү эмгек чөйрөсүн түзүү маселелерине арналды. Бул тууралуу Эмгек, социалдык камсыздоо жана миграция министрлигинин маалымат кызматы билдирди.

Эмгек, социалдык камсыздоо жана миграция министрлигинин орун басары Айнура Орозбаева белгилегендей, учурда Кыргызстанда 221 миңден ашык майыптыгы бар адам жашайт, алардын 29 миңи иштөөгө мүмкүнчүлүгү бар. 2025-жылдын 9 айында 221 майыптыгы бар адам жумушка орноштурулду, бул 2020-жылга салыштырмалуу эки эсеге көп.

Жаңы Эмгек кодексине ылайык, кызматкерлеринин саны 25тен жогору болгон уюмдар майыптыгы бар жарандар үчүн кеминде 4% жумуш ордун камсыз кылууга милдеттүү. Ошондой эле "Социалдык контракт" жана "Чексиз" демилгелери өз алдынча ишкердикти өнүктүрүүгө жана инклюзивдүү жумуш орундарын түзүүгө өбөлгө түзүп жатат.

Иш-чаранын жүрүшүндө майыптыгы бар адамдарды колдоо жана инклюзивдүү эмгек рыногун өнүктүрүү боюнча сунуштар талкууланды.