Таласта ири өлчөмдө баңгизат каражатын сактап жүргөн жаран кармалды
Талас ОИИБге Талас облусунун 62 жаштагы тургуну Ч.К. аттуу жаран баңгизатты колдонуп жана өзү жашаган үйүндө сактап жүргөндүгү туураалуу маалымат келип түшкөн. Анын натыйжасында КРнын Кылмыш-жаза кодексинин баңгизат каражаттарын сатып өткөрүү максатында мыйзамсыз даярдоо боюнча кылмыш иши козголгон.
Тергөөнүн жүрүшүндө, 2025-жылдын 11-декабрында Талас ОИИБдин баңгизатты мыйзамсыз жүгүртүүгө каршы күрөшүү кызматынын жана ИИМдин Талас облусу боюнча атайын операциялар отрядынын кызматкерлери тарабынан жүргүзүлгөн ыкчам-иликтөө иштеринин натыйжасында, кылмыш ишине шектүү катары Талас шаарынын 1963-ж.т тургуну Ч.К. кармалды. Талас шаарындагы анын турак-жайын жана короо-сарайларын тинтүү учурда, бангизаттардын марихуана 18288,54 грамм, каннабистин соломасы 4062 грамм, гашиш 1,29 грамм алынган. Алынган баңгизаттын жалпы салмагы 22 кг, 351 гр түзөт.
Шектүүгө карата Талас шаардык соту тарабынан баш коргоо чарасы каралып, убактылуу кармоочу жайга киргизилди. Учурда тергөө амалдары жүргүзүлүп жатат.
