Чүйдө 78 кайра иштетүүчү ишкана жана 7 соода‑логистикалык борбор ачылат
Суу ресурстары, айыл чарба жана кайра иштетүү өнөр жайы министрлиги 2030-жылга чейин айыл чарба продукциясын кайра иштетүү деңгээлин 25%га чейин жеткирүүнү максаттап, өлкө боюнча жалпы 385 кайра иштетүү ишканасын түзүү боюнча иштерди жүргүзүүдө. Бул тууралуу Айыл чарба министрлигинин маалымат кызматынан билдиришти.
Чүй облусунда 7 соода‑логистикалык борбор жана 78 кайра иштетүүчү ишкана ачуу пландалууда. Алар айыл чарба продукциясын сактоо, жоготууларды азайтуу жана кайра иштетүүнү көбөйтүү үчүн иштейт. Өндүрүш буудай, жашылча‑жемиш, мөмө‑жемиш, сүт, эт, жүн, май жана тоют менен байланыштуу болот.
Район жана шаарлар боюнча пландар төмөнкүдөй:
• Аламүдүн району – 1 СЛБ, 6 кайра иштетүүчү ишкана;
• Жайыл району – 1СЛБ, 14 кайра иштетүучү ишкана;
• Москва району – 1 СЛБ, 12 кайра иштетүүчү ишкана;
• Сокулук району – 1 СЛБ, 8 кайра иштетүүчү ишкана;
• Ысык-Ата району – 1 СЛБ, 9 кайра иштетүүчү ишкана;
• Кемин району – 1 СЛБ, 6 кайра иштетүүчү ишкана;
• Панфилов району: 5 кайра иштетүүчү ишкана;
• Чүй району – 1 СЛБ, 9 кайра иштетүүчү ишкана;
• Токмок шаары – 9 кайра иштетүүчү ишкана;
• Бишкек шаары – 5 кайра иштетүучү ишкана;
Бул чаралар бардык район жана айыл аймактарды камтып, ар бир аймактын адистешүүсүнө ылайык ишканаларды туруктуу чийки зат менен камсыздоого шарт түзөт. Натыйжада айыл чарба продукциясынын жоготуулары азайып, жаңы жумуш орундар түзүлүп, агроөнөр жай комплекси атаандаштык жөндөмүн кеңейтет.
Министрлик ишкерлерди жана инвесторлорду кызматташууга чакырат, анткени бул демилгелер аймактарда кайра иштетүү тармагын жана агробизнес секторун өнүктүрүүгө жаңы мүмкүнчүлүктөрдү түзөт.
