Кыргызстанда 526 мектеп онлайн окууга өттү жана 403 бала бакча убактылуу жабылды
Кыргызстанда курч респиратордук вирустук инфекциялар (КРВИ) жана сасык тумоого чалдыгуунун айынан 15-декабрга карата республика боюнча инкубациялык мезгилге байланыштуу, 526 мектеп онлайн окутууга өткөрүлдү.
Ошондой эле 403 мектепке чейинки билим берүү мекемеси инкубациялык мезгилге жабылды. Мындай билдирүүнү Саламаттыкты сактоо министрлигинен кабарлашты.
Маалыматка ылайык, 2025-жылдын 8–14-декабрь ичинде КРВИ жана сасык тумоонун 37 629 учуру катталган. Бул 1-7-декабрга салыштырмалуу оорулардын саны 11,7%га аз. Ооругандардын жалпы санынын 72%ын 14 жашка чейинки балдар түзөт.
Аймактык санитардык-эпидемиологиялык көзөмөл борборлорунун адистери КРВИ жана сасык тумоого чалдыгуу боюнча күн сайын мониторинг жүргүзүүнү улантууда.
