Кыргызстанда аймактарды өнүктүрүүнүн жаңы ыкмасы иштелип чыгууда
Экономика жана коммерция министрлиги БУУнун Өнүктүрүү программасынын Кыргызстандагы өкүлчүлүгү менен биргеликте өлкөдө өсүү борборлорун алгачкы пландаштыруу боюнча биринчи бирдиктүү методологияны иштеп чыгууну баштады. Бул тууралуу Экономика жана коммерция министрлигинен билдиришти.
Демилге Россия-БУУӨП өнөктөштүгүнүн алкагында ишке ашырылып жаткан долбоордун (III фаза) эксперттик колдоосу менен жүргүзүлүүдө.
Бул методология Министрлер Кабинетинин 2025-2030-жылдарга карата өсүү борборлорун түзүү жана өнүктүрүү программасын ишке ашырууга багытталган. Ал башкы планды иштеп чыгууда стандартташтырылган мамилени камсыздап, аймактардын узак мөөнөттүү өнүгүүсүн системалуу пландаштырууга шарт түзөт.
Башкы план жашоо сапатын жогорулатуу, экономикалык өсүш жана экологиялык туруктуулук сыяктуу максаттарды так жана өлчөнө турган көрсөткүчтөр аркылуу ишке ашырууга мүмкүндүк берет. Пландоого жергиликтүү бийлик органдары, бизнес өкүлдөрү, жарандык коом жана тургундар активдүү тартылат.
Демилге шаарлардын жана аймактардын тең салмактуу, ачык жана туруктуу өнүгүүсүнө өбөлгө түзүп, инвестициялык жагымдуулукту жана калктын жашоо сапатын жогорулатууга багытталган.
