Айыл чарба министри дыйкандарды заманбап сугаруу системаларын колдонууга чакырды
Суу ресурстары, айыл чарба жана кайра иштетүү өнөр жайы министри Бакыт Төрөбаев дыйкандарды суу үнөмдөөчү заманбап системаларды орнотууга чакырды. Бул тууралуу ведомствонун маалымат кызматынан билдиришти.
Министрдин айтымында, климаттын өзгөрүшү, мөңгүлөрдүн эриши жана жаан-чачындын азайышы суу ресурстарын үнөмдөөнү талап кылат, айрыкча Ысык-Көлдө абал татаал.
Өкмөт суу сактагычтарды куруп, каналдарды реконструкциялап, бетон полотно чыгаруучу заводду ишке киргизүү аркылуу жоготууларды азайтууда. Учурда заманбап сугаруу системалары 16 миң гектарга орнотулган, 2030-жылга чейин 200 миң гектарга жеткирүү пландалууда.
Дыйкандар үчүн каржылоо мүмкүнчүлүктөрү бар: мамлекеттик жана райондук фонддор, банктар, Дүйнөлүк банк долбоорлору, 2026-жылдан тарта жеңилдетилген кредиттик механизмдер.
"Бул системалар сууну үнөмдөп, түшүмдү көбөйтүп, продукциянын сапатын жакшыртат. Натыйжада дыйкандардын кирешеси өсөт", — деди Бакыт Төрөбаев.
