Араванда 400 млн сомдук таза суу долбоору: 27 км суу түтүгү тартылууда
Аравандын Керме-Тоо айыл аймагына таза суу тартуу иштери кызуу уланып жатат. Бул тууралуу Президенттин Ош облусундагы өкүлчүлүгү билдирди.
Бүгүн Ош облусунун башчысы Аманкан Кенжебаев "АРИС" уюму тарабынан ишке ашырылып жаткан долбоордун жүрүшү менен таанышып, иштердин сапатына өзгөчө көңүл бурууну тапшырды.
Маалыматка караганда, таза суу долбоору өткөн жылы башталып, учурда активдүү фазада уланууда. Долбоор алкагында жалпы 27 чакырым аралыктан таза суу түтүктөрү тартылып, сыйымдуулугу 1500 куб метрди түзгөн суу кампасы курулууда.
Жалпы наркы 400 млн сомдон ашкан долбоор 2026-жылдын март айында толук аяктап, аймактын тургундары таза суу менен үзгүлтүксүз камсыздандырылат.
Бул демилге Керме-Тоо айылындагы жашоо-шарттарын жакшыртуу жана аймактын инфраструктурасын өнүктүрүүдө маанилүү кадам болуп саналат.
