Башкы прокурор Дохада Кыргызстандын коррупцияга каршы чараларын таанытты
15-19-декабрда Башкы прокурор Максат Асаналиев Катардын Доха шаарында Бириккен Улуттар Уюмунун Коррупцияга каршы конвенциясына катышуучу мамлекеттердин конференциясынын XI сессиясына (CoSP-11) катышууда.
Иш-чарага 190дон ашык мамлекеттин өкүлдөрү, 2 000ден ашуун прокурорлор, коррупцияга каршы органдардын жетекчилери, эл аралык уюмдардын өкүлдөрү, эксперттик жана жарандык коомдун өкүлдөрү катышууда. Конференция БУУнун коррупцияга каршы конвенциясын ишке ашыруу жана эл аралык кызматташтыкты чыңдоо маселелерин талкуулоочу глобалдык платформа болуп саналат.
Сессияда Башкы прокурор Кыргыз Республикасынын коррупцияга каршы күрөшүүдө көрүлүп жаткан чараларына, жетишкендиктерине, укуктук жана институционалдык базаны бекемдөөгө, ошондой эле эл аралык кызматташтыкты өнүктүрүүгө токтолду.
Мындан тышкары, CoSP-11 алкагында Башкы прокурор АКШнын эл аралык баңгизаттарга жана укук коргоо маселелерине жооптуу бюросунун өкүлү Мэгги Нарди менен жолугушуп, мындан аркы кызматташтык маселелерин талкуулады.
Кыргызстандын делегациясынын катышуусу өлкөнүн эл аралык антикоррупциялык стандарттарды сактоого берилгенин жана глобалдык коррупцияга каршы күрөшүүгө активдүү катышып жатканын тастыктайт.
