Салык кызматы жылдык планды тарыхта биринчи жолу мөөнөтүнөн мурда аткарды
Мамлекеттик салык кызматы көз карандысыз Кыргызстандын тарыхында алгач ирет салыктарды жана төлөмдөрдү жыйноо боюнча жылдык бекитилген планды мөөнөтүнөн мурда толук аткарды. Бул тууралуу Салык кызматынын басма сөз кызматынан билдиришти.
Бекитилген планга ылайык, 2025-жылы бюджетке 268 млрд 326,4 млн сом салык түшүүсү каралган. Учурда бул көрсөткүч толук аткарылып, жыл соңуна чейин план ашыгы менен аткарылары күтүлүүдө. Алдын ала эсептөөлөргө ылайык, жыл аягында салыктар жана төлөмдөрдүн жалпы көлөмү 300 млрд сомдон ашышы мүмкүн.
2025-жылдын январь-ноябрь айларында эле Салык кызматы тарабынан 275 млрд 742 млн сом салыктар жана төлөмдөр жыйналды. Бул белгиленген планга салыштырмалуу 12 млрд 271 млн сомго көп. Өткөн жылдын ушул мезгилине салыштырганда түшүүлөр 71 млрд 881 млн сомго өстү.
Ошондой эле камсыздандыруу төгүмдөрү боюнча да оң көрсөткүчтөр катталды. 11 айдын ичинде 74 млрд 57 млн сом камсыздандыруу төгүмдөрү жыйналып, план 1 млрд 217 млн сомго ашыкча аткарылды. Бул 2024-жылдын ушул мезгилине салыштырмалуу 7 млрд 680 млн сомго көп.
Жалпысынан жылдын 11 айында салыктар жана камсыздандыруу төгүмдөрү боюнча түшүүлөрдүн суммасы 349,8 млрд сомго жетти. Белгилей кетсек, бул өсүш салык жүгүн көбөйтүү эмес, салык төлөөчүлөрдүн базасын кеңейтүү, процесстерди санариптештирүү жана ыктыярдуу төлөөнүн деңгээлин жогорулатуу аркылуу камсыздалды.
