Уюшкан кылмыштуу топту системалуу каржылаган деген шек менен ишкер кармалды
УКМК уюшкан кылмыштуу топтордун ишмердүүлүгүн жана алардын каржылоо булактарын аныктоо жана бөгөт коюу боюнча жүргүзүлүп жаткан иш-чаралардын алкагында К.Асанбектин уюшкан кылмыштуу тобун системалуу түрдө каржылоого катышкан С.К.К. аттуу ишкерди кармады.
УКМКнын билдирүүсүнө караганда, С.К.К. аттуу ишкер жоюлган “мыйзамдагы ууру” К.Асанбек менен тыгыз байланышта болгон. Ошондой эле Ош шаарынын жана Ош облусунун калкынын колдоосу менен өзүнүн таасирин күчөтүү максатында К. Асанбек менен К. Досоновду ай сайын белгилүү бир суммадагы акча которуу менен системалуу түрдө каржылап келген. Алардын колдоосу менен С.К.К. күйүүчү-майлоочу материалдарды Кыргыз Республикасына аткезчилик жол менен алып өтүүнүн туруктуу схемасын түзгөн.
Белгилей кетсек, К.Асанбек менен К.Досоновдун колдоосу менен С.К.К. өзүнө жакпаган адамдарга физикалык таасир этүү үчүн уюшкан кылмыштуу топтун мүчөлөрүнүн “кызматтарына” кайрылган.
Жүргүзүлгөн тергөө жана оперативдүү иш-чаралардын натыйжасында, ишкер кармалып, КР УКМКнын тергөө абагына киргизилди.
Учурда, тергелип жаткан кылмыш ишинин алкагында, УКМК уюшкан кылмыштуу топтордун кылмыштуу ишмердүүлүгүн каржылоо каналдарын аныктоого жана бөгөт коюуга багытталган бир катар ыкчам-издөө иш-чараларын улантууда.
