Айыл чарба министрлиги Курултайдагы кайрылуулар үчүн электрондук система түздү
Суу ресурстары, айыл чарба жана кайра иштетүү өнөр жайы министрлиги III Элдик Курултайда делегаттардан келген суроо-талаптардын жана сунуштардын аткарылышын көзөмөлдөө үчүн электрондук кырдаалдык картаны тааныштырды. Бул тууралуу министрликтин басма сөз кзыматынан билдиришти.
Маалыматтык система министрликке караштуу "Агросмарт" мамлекеттик мекемеси тарабынан иштелип чыккан. Система Курултайда эле келип түшкөн суроолорду жана сунуштарды камтыйт.
Ар бир колдонуучуга жеке логин жана пароль берилет, бул маалымат коопсуздугун камсыз кылат. Система аркылуу аткарылып жаткан иштер этап-этабы менен чагылдырылып, министрликтин жетекчилиги туруктуу көзөмөл жүргүзө алат.
Курултайдын жыйынтыгы боюнча эң көп суроо-талаптар жана сунуштар дал ушул министрликке келип түшкөнү белгиленди.
2025-жылга карата Курултайдан 410 пункттан турган иш-чаралар планы бекитилген. Алардын ичинен 50 иш-чара (12%) аткарылып, 360 иш-чара (88%) аткарылуу баскычында турат. Кайрылуулардын 60% ирригация маселелерине, 23% ичүүчү таза суу көйгөйлөрүнө тиешелүү.
Министрлик билдиргендей, ичүүчү таза суу долбоорлорун ишке ашыруу орточо 3–3,5 жылга созулат жана туруктуу каржылоо менен көзөмөлгө алынган. Системанын жардамы менен министрлик жарандардан түшкөн суроо-талаптарды натыйжалуу аткарып, мамлекеттик иштердин ачык-айкындуулугун камсыз кылууну пландап жатат.
