Аскердик ЖОЖго киргизүү үчүн пара алгандардын коррупциялык иштери аныкталды
УКМК Аскер прокуратурасы менен биргеликте, 2025-жылдын 11-декабрында пара алуу жана кызматтык жасалмачылык фактысы боюнча, Кыргыз Республикасынын Коргоо министрлигинин айрым кызмат адамдарынын коррупциялык иштерин аныктады.
УКМК маалыматына караганда, 2024-жылы Улуттук аскер лицейинин бүтүрүүчүсү З.А.Э. жалпы республикалык тестирлөөнүн жыйынтыгы боюнча 108 упай алган, бул Аскердик жогорку окуу жайына кирүү үчүн жетишсиз болуп саналат. Бирок, кабыл алууга корутунду документтерди даярдоодо аталган абитуриенттин ЖРТсынын жыйынтыктары жасалма түрдө, 129 упай катары киргизилип, бул Аскердик жогорку окуу жайына кабыл алуу үчүн негиз болгон.
Жүргүзүлгөн ыкчам-иликтөө иш-чараларынын жыйынтыгы боюнча, аталган абитуриенттин апасы Дж.Н.А. Коргоо министрлигинин аскер кызматкери К.С.А. аркылуу Коргоо министрлигинин Кадрлар боюнча башкы башкармалыгынын жооптуу кызматкери, майор А.А.А. менен уулун жогорку окуу жайына киргизүү маселеси боюнча макулдашууга жетишкени аныкталган. Көрсөтүлгөн кызматтар үчүн 3500 АКШ доллары алынган, ал эми кошумча 40 000 сом К.С.А.га берилген, ал эми РСК банк терминалы аркылуу 45 000 сом A.A.A.нын жеке эсебине которулган, жалпы сумма 4500 АКШ долларын түзгөн.
Бишкек шаарынын Биринчи май райондук сотунун тергөө судьясынын чечими менен майор А.А.А. эки айлык мөөнөткө №1 тергөө абагына камакка алынды.
Учурда УКМК Аскер прокуратурасы менен биргеликте аталган коррупциялык схемага тиешеси бар башка адамдарды аныктоо боюнча тиешелүү ыкчам-издөө жана тергөө иш-чараларын улантууда.
