Балык чарбасында санариптик көзөмөл системасы ишке кирүүдө
Суу ресурстары, айыл чарба жана кайра иштетүү өнөр жайы министрлиги балык чарбасын жана аквакультураны санариптик көзөмөлдөө системасын этап-этабы менен ишке киргизүүдө. Бул система балык продукциясын өндүрүүдөн баштап сатууга чейин толук көзөмөлдөөнү камсыз кылат.
Министрликтин маалыматына ылайык, учурда балыктын икрасынан баштап чабактардын жана ири балыктын кыймылы мониторингден өтүп, балык продукциясынын кыймылы толук көзөмөлгө алынган. Балык чарбалары идентификацияланып, маалыматтар Жаныбарларды идентификациялоо жана көзөмөлдөө системасына (ИС СИОЖ) киргизилди.
2026-2027-жылдары балык жана балык продукциясынын кыймылы толук ИС СИОЖ аркылуу көзөмөлдөнөт. Ар бир модуль алгач тесттик режимде иштелип чыгып, пилоттук аймакта апробациядан өтүп, андан соң республика боюнча толук киргизилет.
Бул иштер Корея Республикасынын каржылоосу менен "Кыргыз Республикасында жаныбарларды идентификациялоо жана көзөмөлдөөнүн комплекстүү интеллектуалдык системасын түзүү" долбоорунун алкагында жүргүзүлүүдө. Натыйжада балык чарбасында ачык-айкындык жогорулайт, көлөкө рынок кыскарат, инвесторлор үчүн ишенимдүү шарт түзүлүп, керектөөчүлөр коопсуз жана сапаттуу балык продукциясына ээ болушат.
