Таласта Жаратылыш министрлигине караштуу 80 млн сомго жаңы имарат курулат
Бүгүн 18-декабрда Талас шаарында Жаратылыш ресурстары, экология жана техникалык көзөмөл министрлигинин Талас облустук башкармалыгынын жаратылышты коргоочулары үчүн жаңы административдик имараттын курулушуна капсула салуу аземи болуп өттү. Бул тууралуу министрликтин маалымат кызматынан билдиришти.
Иш-чарага министрдин биринчи орун басары Б. Джусупбеков, Президенттин Талас облусундагы ыйгарым укуктуу өкүлүнүн биринчи орун басары М. Байжигитов жана жергиликтүү өз алдынча башкаруу органдарынын өкүлдөрү катышты.
Жаңы имараттын сметалык баасы 80 млн сомду түзөт жана курулуш Министрликтин бюджети аркылуу каржыланат. Жалпы аянты 900 чарчы метрди түзгөн имарат облустук башкармалыктын ишин натыйжалуу жүргүзүүгө багытталган заманбап шарттар менен камсыздалат.
Бул долбоор министрликтин аймактык башкаруу системасын чыңдоого багытталган маанилүү кадам болуп саналат. Имарат пайдаланууга берилгенден кийин жаратылыш ресурстарын коргоо, экологиялык коопсуздукту камсыз кылуу жана техникалык көзөмөлдү күчөтүү иштери кыйла натыйжалуу жүргүзүлүп, жарандарга көрсөтүлүүчү мамлекеттик кызматтардын сапаты жана жеткиликтүүлүгү жогорулайт.
