Акыйкатчы институтуна 9 кызматтык автоунаа тапшырылды
Бүгүн КРын Акыйкатчы институтуна кызматтык автоунааларды тапшыруу аземи болуп өттү.
Иш-чаранын жүрүшүндө Президенттин Иш башкармалыгынын жетекчиси Каныбек Туманбаев Chevrolet Cobalt үлгүсүндөгү 9 кызматтык автоунаанын ачкычтарын расмий түрдө Акыйкатчы институтуна тапшырды. Аталган автоунаалар өлкөнүн 6 облусундагы Акыйкатчы институтунун өкүлчүлүктөрүнө бөлүштүрүлөт.
Акыйкатчы Жамийла Жаманбаева бул автоунаалар борбордук аппараттын жана аймактык өкүлчүлүктөрдүн ишмердүүлүгүн чыңдоого чоң өбөлгө түзөрүн белгиледи.
“Бүгүн кызматтык автоунааларды алуу – бул борбордук аппаратта да, аймактарда да ишибизди күчөтүү үчүн маанилүү кадам. Бул автотранспорт жарандардын кайрылууларына ыкчам жооп кайтарууга, көчмө иш-чараларды кеңейтүүгө жана өлкөнүн бардык аймагында адамдын укуктарын жана эркиндиктерин натыйжалуу коргоону камсыз кылууга мүмкүндүк берет”, – деди акыйкатчы.
Белгилей кетсек, Акыйкатчы Жамийла Жаманбаеванын Президент Садыр Жапаров менен болгон жолугушуусунан кийин институттун материалдык-техникалык базасын чыңдоо максатында кызматтык автоунааларды сатып алууга республикалык бюджеттен 9 миллион сом бөлүнгөн.
