Кара-Сууда 105 млн сомго курулган жаңы мектеп жакында ачылат
Кара-Суу районунун Кайрагач айылында жаңы мектептин курулушу толук аяктап, жакынкы күндөрү окуучуларга эшигин ачат. Бул тууралуу Курулуш, архитектура жана турак жай-коммуналдык чарба министрлигинен билдиришти.
275 орунга ылайыкталган мектеп республикалык бюджеттин эсебинен курулуп, долбоордун жалпы наркы 105 миллион сомду түздү.
Жаңы мектеп төрт блоктон туруп, эки кабаттуу окуу имаратын, жыйындар залын жана спорт залын камтыйт. Имараттын жалпы аянты 2 262 чарчы метрди түзөт.
Курулуш иштери заманбап талаптарга ылайык жүргүзүлүп, мектеп билим берүү процессине керектүү бардык жабдуулар менен камсыздалды. Жаңы билим берүү мекемеси айылдагы окуучулар үчүн ыңгайлуу жана коопсуз шарттарды түзөт.
