Кыргызстан менен СУАР курулуш тармагында кызматташтыкты чыңдоону макулдашты
18-декабрда Кытай Эл Республикасынын Үрүмчү шаарында Кыргыз Республикасынын Курулуш, архитектура жана турак-жай-коммуналдык чарба министри Нурдан Орунтаев менен Синьцзян-Уйгур Автономдук Районунун турак-жай курулушу жана аймактарды өнүктүрүү департаментинин парткомунун катчысы Ли Хунбин эки тараптуу жолугушту.
Курулуш министрлигинин маалыматына ылайык, жолугушуунун жүрүшүндө тараптар кызматташтыкты түзүү жана мындан ары чыңдоо, курулуш иштеринин сапатын көзөмөлдөө, сейсмикалык туруктуулукту камсыздоо, жана курулуш адистеринин квалификациясын жогорулатуу боюнча тажрыйба алмашуу маселелерин талкуулашты.
Белгилей кетсек, 17-декабрда министр Кыргызстандын 30га жакын курулуш компанияларынын жетекчилери менен Үрүмчү шаарына сапарлап, шаардагы курулуш материалдары тармагындагы өндүрүштүк мүмкүнчүлүктөр менен таанышып, СУАРдын өндүрүш ишканалары менен кызматташтык байланыштарды түзүүнү максат кылышкан.
