Нарын облусунда жайыттарды башкарууда жаңы концепция сунушталды
Суу ресурстары, айыл чарба жана кайра иштетүү өнөр жайы министрлигине караштуу Ветеринария, мал чарбасын өнүктүрүү, жайыт жана тоют кызматы Нарын облусунун мисалында “Кыргыз Республикасында жайыттарды башкаруу концепциясын” пилоттук форматта ишке ашырууну пландап жатат. Бул тууралуу ведомстводон билдиришти.
Бул тууралуу кызматтын директорунун орун басары Ишенбек Алмамбетов “Жайыттардын абалын жакшыртуу жана аларды рационалдуу пайдалануу” темасында өткөн семинарда билдирди.
Нарын облусунда климаттык шарттардын катаалдыгы, бийик тоолуу рельеф жана жайытка болгон басымдын өсүшү жайыттардын деградация коркунучун күчөтүүдө. Жаңы концепция жайыттарды туруктуу пайдаланууга, калыбына келтирүүгө жана мал чарбасынын өндүрүмдүүлүгүн жогорулатууга багытталган.
Концепция туруктуулук, коомчулукка негизделген башкаруу, айкындуулук, илимий негиздүүлүк жана санариптештирүү принциптерине таянат. Ошондой эле жайыттан түшкөн каражаттардын 100%ын түздөн-түз жайыт тармагына багыттоо жана аларды башкаруу үчүн адистешкен мамлекеттик жайыт ишканасын же атайын фонд түзүү сунушталууда.
Белгилей кетсек, семинарга өлкөнүн жети облусунан адистер катышып, сунуштардын негизинде пилоттук долбоор колдоого ээ болду.
