УКМК көмүрдүн баасын жасалма кымбаттатууга жол бербестигин эскертти
УКМК тарабынан, Ош шаарынын жана Ош облусунун жергиликтүү бийлик органдарынын кызматкерлеринин катышуусунда көмүр казуучу компаниялардын өкүлдөрү, «Кыргызкөмүр» ААКнын инвесторлору, отун кампаларынын ээлери, ортомчулар жана сатуучулар менен жыйын өткөрүлдү.
УКМКнын басма сөз кызматынын маалыматына караганда, жыйында Ош облусунун калкын отун менен камсыздоо боюнча учурдагы түзүлгөн кырдаал жана аймактын жашоочуларынын нааразычылыгын жаратып жаткан көмүрдүн баасы боюнча маселелер талкууланды.
Жыйындын катышуучуларына көмүрдүн баасын жасалма түрдө көтөрүү аркылуу жарандардын коомдук аң-сезимин манипуляциялоого жол берилбестигин УКМК өкүлдөрү эскертти.
Өз учурда көмүр казуу менен алектенген ишкерлер күз-кыш мезгилинде аларга отун базалары үчүн жер тилкелерин бөлүп берүү маселесин көтөрүп, уюштуруу жана курулуш иштерин каржылоого даяр экендиктерин билдиришти. Бул маселени чечүү ашыкча чыгымдарды, тактап айтканда ортомчулук кызматтарды (көмүр ташуу боюнча) кыскартуу менен көмүрдүн баа саясатына таасирин тийгизери айтылды.
КР УКМК көмүрдүн баа саясаты боюнча каралган мыйзам ченемдеринен тышкары атайылап саботаж жасоо аракеттери кылмыш жоопкерчилигине тартылаарын эскертти.
