Акыйкатчы институтуна 9 кызматтык автоунаа тапшырылды
КРнын Акыйкатчы институтунда Президенттин тапшырмасынын негизинде кызматтык автоунааларды тапшыруу аземи болуп өттү.
Президенттин иш башкармасынын маалыматына ылайык, иш-чарага Президенттин Иш башкаруучусу Каныбек Туманбаев жана Кыргыз Республикасынын Акыйкатчысы (Омбудсмени) Жамила Жаманбаева катышты. Анын жүрүшүндө Институттун материалдык-техникалык базасын чыңдоо максатында Президенттин Иш башкаруучусу Каныбек Туманбаев Chevrolet Cobalt үлгүсүндөгү 9 кызматтык автоунаанын ачкычтарын тапшырды.
Бул автоунаалар өлкөнүн 6 облусунда жайгашкан Акыйкатчы институтунун аймактык өкүлчүлүктөрүнө бөлүштүрүлүп берилмекчи.
Берилген кызматтык автоунаалар Акыйкатчы институтунун аймактардагы ишмердүүлүгүн жакшыртып, жарандардын укуктарын коргоо багытындагы иштерди ыкчам жана натыйжалуу жүргүзүүгө шарт түзөт. Бул кадам мамлекеттик органдардын ишин бекемдөөгө жана элге көрсөтүлүүчү кызматтардын сапатын жогорулатууга багытталган.
