Айыл чарба кооперативдери үчүн 2% жана 10% өлчөмүндөгү салыктык колдоо чаралары
Кыргызстанда айыл чарба кооперативдерин өнүктүрүүгө багытталган мамлекеттик колдоолор натыйжа берип, чакан дыйкан чарбалары атаандаштыкка жөндөмдүү ири товар өндүрүүчүлөргө айланууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Жеңилдетилген кредиттер, лизинг программалары жана салыктык жеңилдиктердин натыйжасында дыйкан чарбалары кооперативдерге биригип, өндүрүш көлөмүн көбөйтүп, продукциянын сапатын жогорулатууда. Бул аларга ички жана тышкы рынокторго ишенимдүү чыгууга шарт түзүүдө.
Суу ресурстары, айыл чарба жана кайра иштетүү өнөр жайы министрлиги тарабынан кооперативдерди өнүктүрүүгө багытталган укуктук ченемдик актылар кабыл алынып, мамлекеттик жер фондунан жерди кезексиз жана конкурссуз негизде ижарага алуу мүмкүнчүлүгү берилди.
Мындан тышкары, айыл чарба кооперативдери өндүрүштөн түшкөн кирешеге жана кошумча нарк салыгына бошотулган. Кооператив мүчөлөрү 2% киреше салыгын, ал эми кооперативде иштеген жумушчулар 10% салык төлөшөт.
Белгилей кетсек, Министрлер Кабинети тарабынан 2023-2027-жылдарга карата Айыл чарба кооперациясын өнүктүрүү программасы кабыл алынган. Программанын максаты — калкты коопсуз жана сапаттуу азык-түлүк менен камсыз кылуу, агроөнөр жай комплексинин инвестициялык жана экспорттук потенциалын жогорулатуу жана импортту алмаштырууну күчөтүү.
